શું કીધું ? શબ્દોનું સરનામું ? લ્યો લખો ...

1. તળાજા, ભાવનગર
વેદ તો એમ વદે, શ્રુતિ-સ્મૃતિ શાખ દે
કનક કુંડલ વિશે ભેદ ન્હોયે;
ઘાટ ઘડિયાં પછી નામરૂપ જૂજવાં
અંતે તો હેમનું હેમ હોયે.
- નરસિંહ મહેતા

2. કપડવંજ, ખેડા
ભાઈ રે, આપણા દુ:ખનું કેટલું જોર?
નાની એવી જાતક વાતનો મચવીએ નહિ શોર !
- રાજેન્દ્ર શાહ

3. સાવલી, વડોદરા
ગયા જન્મેય ‘માણસ’ નામની જાતે હું જન્મ્યો હઈશ
નહીં તો આવડા તે હોય, આ જે થાક લાગ્યા છે!
– ઉશનસ્

4. અમરેલી
‘રમેશ’, હોય છે સાપેક્ષ સર્વ ઘટનાઓ
તમારી પીડા બીજાની ખુશાલી હોઈ શકે
- રમેશ પારેખ

5. બાંટવા, જૂનાગઢ
પર્વતને ઊંચકું પણ પાંપણ ન ઊંચકાતી,
આ ઘેન જેવું શું છે, આ કારી ઘાવ શું છે?
- રાજેન્દ્ર શુક્લ

6. ભરૂચ
સોયમાં દોરાને બદલે બા હતી;
ગોદડીમાં હૂંફ પણ સિવાઈ ગઈ.
– ગૌરાંગ ઠાકર

7. દાહોદ
પતન થાશે તમારા કુળનું ત્યારે અમારા આંસુઓને દોષ ના દેશો,
તમે પણ ભીષ્મ માફક બોલવું 'તું , ત્યાં નથી બોલ્યા; અમે એના પછી રોયાં.
- રિન્કુ રાઠોડ

8. બીલીમોરા, નવસારી
અઠંગ આંખ હોય પણ ફરક કળી શકો નહીં,
મને મળ્યા પછી તમે તમે રહી શકો નહી.
- હર્ષવી પટેલ

9. વિજાપુર, મહેસાણા
એક જણ સાચું રડે તો બહુ થયું,
મૌન ક્યાં આખી સભાનું જોઈએ ?
-ચિનુ મોદી

10. કઠોદરા, સુરત
છાતીને વીંધી જે સોંસરવો નીકળ્યો એ શબ્દોનો ખુલ્લો ને ખુલ્લો ભડાકો છે;
અગ્નિ ને વાયુ બે ભેગા થયા પછી સૃષ્ટિનો મોટામાં મોટો નિહાકો છે.
-નયન દેસાઈ

11. સુરત
એના ઈશારા રમ્ય છે પણ એને શું કરું ?
રસ્તાની જે સમજ દે, અને ચાલવા ન દે.
– મરીઝ

12. કહાનવાડી, આણંદ
ભણ્યાગણ્યા બહુ દરિયા ડો’ળ્યા
ગિનાન ગાંજો પીધો,
છૂટ્યો નહીં સામાન
ઉપરથી છાંયો બાંધી લીધો,
જાતર ક્યાં અઘરી છે, જીવણ ? થકવી નાખે થેલો…
મેલો, દલપત, ડા’પણ મેલો.
-દલપત પઢિયાર

13. કચ્છ
મારા લોહીનું એ ગુજરાતીપણું
ટેરવાની ટોચ પર કક્કો ફૂટે!
-શબનમ ખોજા

14. વઢવાણ, સુરેન્દ્રનગર
લાગે જ્યારે ઘરમાં લ્હાય, ખોદે કૂવો નહિ ખોદાય;
સદા પ્રથમ કરિયે સંભાળય, પાણી પહેલી ચણિયે પાળ.
-દલપતરામ

15. રાજકોટ
ગુંજ્યા કરે છે રાતદિવસ એક પ્રશ્ન કે,
જેનું રહે ન કોઈ એ કોના થતાં હશે?
-પારુલ ખખ્ખર

16. પાટણ
મુખ દેખાડીને ઘેલાં કીધાં, જાણે હરાયાં ઢોર;
ભાલણ-પ્રભુ રઘુનાથજી, મારા ચિત્તલડાના ચોર.
-ભાલણ

17. વડાલી,સાબરકાંઠા
સામેની ફૂટપાથ ઉપર સૂતાં હો બાળક ભૂખ્યાં પેટે આંસુ પીને ઊના શ્વાસે
સામેની ફૂટપાથે કોઈ હોટલ આલીશાન મળેને, ત્યારે સાલું લાગી આવે.
-મુકેશ જોષી

18. કિલ્લા પારડી,વલસાડ
તારી શકે છે સત્ય ફક્ત શોધનારને
છે શક્ય, તુજને હે અનુગામી! રટણ નડે.
-રઇશ મનીઆર

19. બામણા, અરવલ્લી
ગર્ભમાં રહેલા બાળકની બીડેલી આંખો
માતાના ચહેરામાં ટમકે,
મારા અસ્તિત્વમાં એમ કાવ્ય ચમકતું તમે
જોયું છે ?
- ઉમાશંકર જોશી

20. અમદાવાદ
કાળની કેડીએ ઘડીક સંગ,
રે ભાઈ, આપણો ઘડીક સંગ;
આતમને તોય જનમોજનમ લાગી જશે એનો રંગ !
-નિરંજન ભગત