શક્તિસ્વરૂપા નારી મહોત્સવ: અનુભવ કથન

ભારતીય સંસ્કૃતિમાં નારીને માત્ર પરિવારની આધારશિલા જ નહીં, પરંતુ સૃષ્ટિના સર્જન, સંસ્કાર અને સમાજ પરિવર્તનની શક્તિ તરીકે માનવામાં આવી છે. આ જ શાશ્વત વિચારને જીવંત કરતો "શક્તિસ્વરૂપા નારી મહોત્સવ" તા. 29 જૂન, 2026ના રોજ નારાયણી ટ્રસ્ટ, વડોદરા તથા શ્રી કન્યા કેળવણી મંડળ, ઊંઝાના સંયુક્ત ઉપક્રમે ઊંઝા ટાઉન હોલ ખાતે ભવ્ય રીતે યોજાયો. ઊંઝા શહેરની બહેનોએ મોટી સંખ્યામાં ઉપસ્થિત રહી કાર્યક્રમને જીવંત બનાવી દીધો હતો. સમગ્ર ટાઉન હોલ માતૃશક્તિના ઉત્સાહ અને ઉર્જાથી છલકાતો હતો. શહેરના અગ્રણી નાગરિકોની ઉપસ્થિતિએ કાર્યક્રમના ગૌરવમાં વધુ વધારો કર્યો.આ કાર્યક્રમમાં સહભાગી બનવાનો અવસર મારા માટે અત્યંત પ્રેરણાદાયી અને સ્મરણીય રહ્યો.

આ કાર્યક્રમની સૌથી નોંધપાત્ર વિશેષતા એ હતી કે તે કોઈ ધાર્મિક કે સાંપ્રદાયિક કાર્યક્રમ નહોતો, પરંતુ ભારતીય જ્ઞાનપરંપરા, નારીશક્તિ અને જીવનમૂલ્યોને કેન્દ્રમાં રાખીને આયોજિત એક આગવો સામાજિક અને સાંસ્કૃતિક ઉપક્રમ હતો. કાર્યક્રમના અધ્યક્ષ તરીકે ઊંઝાના ધારાસભ્ય શ્રી કિરીટ પટેલ ઉપસ્થિત રહ્યા હતા. મુખ્ય વક્તા શ્રી સંતોષ ભાટવડેકરે સતી સાવિત્રીની કથાને માત્ર પૌરાણિક પ્રસંગ તરીકે રજૂ કરી નહોતી, પરંતુ તેની પાછળ રહેલા રૂપકાત્મક અર્થ, જીવનદર્શન અને તત્ત્વચિંતનને સરળ અને અસરકારક રીતે સમજાવ્યું. તેમના વક્તવ્ય દ્વારા સ્પષ્ટ થયું કે ભારતીય સંસ્કૃતિની અનેક કથાઓમાં ગૂંથાયેલા પ્રતીકો માનવજીવનને દિશા આપતા શાશ્વત જ્ઞાનના વાહક છે. તેમણે ભારતીય સંસ્કૃતિના પાયામાં રહેલી જ્ઞાનપરંપરા, મૂલ્યવ્યવસ્થા અને ચિંતનધારાને ઉજાગર કરતાં ઉપસ્થિત સૌને વિચારપ્રેરક દૃષ્ટિકોણ આપ્યો.

કાર્યક્રમનું સૌથી આકર્ષક કેન્દ્ર સતી સાવિત્રીના જીવન પર આધારિત લાઇટ એન્ડ સાઉન્ડ સાથેની વાચિક અભિનયાત્મક પ્રસ્તુતિ રહી હતી. આ પ્રકારનો પ્રથમ પ્રયોગ હતો, જેમાં સંવાદ, સંગીત, ધ્વનિપ્રભાવ, પ્રકાશ વ્યવસ્થા અને વાચિક અભિનયના સુમેળ દ્વારા સતી સાવિત્રીના વ્યક્તિત્વને જીવંત કરવામાં આવ્યું હતું. આ રજૂઆત માત્ર દૃશ્યાત્મક ન હતી, પરંતુ તેમાં રહેલા પ્રતીકો અને જીવનમૂલ્યોને અત્યંત અસરકારક રીતે રજૂ કરવામાં આવ્યા હતા. સમગ્ર સભાગૃહ આ અનોખી પ્રસ્તુતિથી મંત્રમુગ્ધ બની ગયું હતું અને અંતે કલાકારોને તાળીઓના ગડગડાટથી વધાવી લેવામાં આવ્યા હતા.

આ મહોત્સવમાંથી પરત ફરતી વખતે મનમાં એક જ ભાવ હતો—આપણું સાંસ્કૃતિક વૈભવ માત્ર ઇતિહાસમાં નથી, તે આજે પણ એટલું જ પ્રાસંગિક છે, જો તેને સમજવાની દૃષ્ટિ અને રજૂ કરવાની સંવેદના હોય. "શક્તિસ્વરૂપા નારી મહોત્સવ" એ આવી જ દૃષ્ટિ અને સંવેદનાનો સુંદર સમન્વય હતો, જે લાંબા સમય સુધી સ્મૃતિમાં પ્રેરણાનો દીપ પ્રગટાવતો રહેશે.

***